អ្នកប្រហែលជាមិនមានការភ្ញាក់ផ្អើល ឬចំលែកចិត្តទេមែនទេ ចំពោះការផលិតចំរៀងរបស់ផលិតកម្មមួយចំនួននាពេលសព្វថ្ងៃនេះ ។ មានមតិខ្លះថាការដែលមានក្រុមហ៊ុនផលិតចំរៀងបានបកប្រែបទចំរៀងពីភាសាបរទេសមកជាភាសាខ្មែរយើងក៏ជាការល្អដែរ ព្រោះបទចំរៀងទាំងនោះពិរោះ និងអាចជាបទពិសោធន៍ក្នុងការផលិតចំរៀងនៅក្នុងប្រទេសរបស់យើង ។ ប៉ុន្តែមានមតិមួយចំនួនទៀតបានលើកឡើងថាការដែលយើងចំលងពីគេមកនេះមិនមែនជាការល្អប៉ុន្មានទេ ហើយអ្វីដែលគួរឲ្យខ្មាស់អៀនបំផុតដែលអ្នកនោះដាក់ឈ្មោះខ្លួនឯងជាអ្នកនិពន្ធ ។
មិនទាន់មានការបកស្រាយឲ្យបានសមស្របនោះទេចំពោះការលួចចំលងបទចំរៀងពីបរទេសជាពិសេសប្រទេសជិតខាងយើង ។ ប៉ុន្តែអ្វីដែលគួរឲ្យខ្មាស់គេបំផុតនោះ គឺការសព្វថ្ងៃនេះមានក្រុមហ៊ុនផលិតបទចំរៀងខ្លះបាន យកបទចំរៀងចាស់ៗ ដែលជាទឹកដមសំនៀងរបស់អ្នកចំរៀងរបស់ខ្មែរពីសម័យមុនមកច្រៀង នេះវាអាចធ្វើឲ្យមានការភាន់ច្រលំសំរាប់កូនខ្មែរ ឬយុវ័យជំនាន់ក្រោយ ។ ពួកអ្នកជំនាន់ក្រោយនឹងមិនដឹងថាបទចំរៀងមួយនោះថាជាបទរបស់អ្នកចំរៀងសម័យថ្មីយើងនេះទៅវិញ ។
ដូចនេះហើយខ្ញុំក៏ជាកូនខ្មែរមួយរូបដែរ ដែលចូលចិត្តស្តាប់ទាំងបទចំរៀងបុរាណ និងសម័យផងដែរ ក៏សុំអភ័យទោសចំពោះអ្នកនិពន្ធយើងសម័យនេះផងថា សូមឲ្យមានមនសិការផងចំពោះវិជ្ជាជីវៈរបស់ខ្លួន សូមឲ្យមានគំនិតគិតរិះរកនូវអត្ថន័យ និងទំនុកច្រៀងថ្មីៗផង កុំចាំតែចំលងគេ និងចំលងគ្នាឯងក្នុងស្រុកទៅវិញ ។ ត្រូវយល់ថាគេដល់ណាហើយ ម្តេចបានជាអាចធ្វើបាន ។
ខ្ញុំមានជំនឿថាមាន ប្រាកដជាមានអ្នកនិពន្ធខ្មែរមួយចំនួនដែលមានសមត្ថភាពចំពោះការនិពន្ធនូវបទថ្មីៗសំរាប់មិត្តអ្នកស្តាប់ ប៉ុន្តែគាត់ទាំងអស់គ្នាមិនធ្វើការបង្ហាញខ្លួន និងសមត្ថភាពរបស់គាត់នោះក៏ព្រោះតែបញ្ហាលួចចំលងពីមួយទៅមួយ ការមិនរក្សានូវស្នាដៃនិពន្ធរបស់គាត់ និងការវាយតំលៃទាបពេកសំរាប់ស្នាដៃនិពន្ធរបស់គាត់ពីសំនាក់ម្ចាស់ផលិតកម្ម ។
No comments:
Post a Comment